Gwybodaeth preifatrwydd

Mae'r arolwg Hynt Graddedigion yn arolwg ar draws y DU sy'n casglu gwybodaeth am weithgareddau a safbwyntiau graddedigion 15 mis ar ôl iddynt orffen eu hastudiaethau. Gofynnir i'r holl raddedigion cymwys sy'n cwblhau cwrs addysg uwch gymryd rhan yn yr arolwg. Bydd eich ymatebion yn helpu myfyrwyr presennol a myfyrwyr yn y dyfodol i gael cipolwg ar gyrchfannau gyrfa a datblygiad. Byddant hefyd yn helpu eich prifysgol neu goleg i werthuso a gwella eu cyrsiau.

Mae'r arolwg o arwyddocâd cenedlaethol, am ei fod yn galluogi llunwyr polisi, elusennau, newyddiadurwyr, ymchwilwyr ac eraill i ddeall y sector addysg uwch a chyflwr y farchnad lafur i raddedigion.

Am ragor o wybodaeth am yr arolwg, gweler ein cwestiynau cyffredin.

Mae'r hysbysiad hwn yn esbonio sut rydym yn defnyddio ac yn rhannu gwybodaeth a gasglwn amdanoch mewn perthynas â'r arolwg Hynt Graddedigion. Bob blwyddyn caiff ei adolygu a'i ddiweddaru. Mae copïau o hysbysiadau blaenorol, yn Saesneg ac yn Gymraeg, ar gael ar ein tudalen Hysbysiadau Casgliadau Hanesyddol.

Y Rheolydd data

Mae Jisc wedi'i gomisiynu gan gyrff cyllido a rheoleiddio addysg uwch (AU) y DU i gynnal yr arolwg Hynt Graddedigion. Mae Jisc yn gyfrifol am gasglu a lledaenu gwybodaeth am AU yn y DU a'r corff data dynodedig ar gyfer Lloegr. Unodd Jisc â'r Asiantaeth Ystadegau Addysg Uwch yn 2022, ac mae'n cadw brand HESA ar gyfer y maes gwaith hwn.

Mae Jisc yn gwmni nid-er-elw ac yn elusen gofrestredig yn Lloegr. Mae Jisc yn berchen ar is-gwmni o'r enw Jisc Services Limited (JSL), a gyda'i gilydd maent yn darparu cynhyrchion a gwasanaethau Jisc. Mae unrhyw gyfeiriad at "rydym", "ni", "ein", "Jisc" a "HESA" yn cyfeirio at y cwmnïau grŵp hyn. Ni yw'r rheolydd data ar gyfer y data personol a brosesir at y dibenion a ddisgrifir isod.

Mae rhagor o wybodaeth am pwy ydym ni a sut i gysylltu â ni ar ddiwedd yr hysbysiad hwn.

Casglu data

Mae'r arolwg yn gofyn am weithgareddau y gallech fod yn eu gwneud ar adeg ymateb. Er enghraifft, efallai eich bod yn gweithio, yn astudio, yn teithio neu'n gofalu am rywun. Felly mae'r data rydyn ni'n ei gasglu amdanoch yn dibynnu ar eich sefyllfa. Mae pob set o gwestiynau gweithgarwch yn cynnwys rhai cwestiynau goddrychol. Mae'r rhain yn gofyn sut rydych chi'n teimlo am eich sefyllfa bresennol, sut mae'r hyn rydych chi'n ei wneud yn cyd-fynd â'ch cynlluniau ar gyfer y dyfodol, ac a ydych yn defnyddio'r hyn a ddysgoch yn eich astudiaethau. Rydym yn cyhoeddi cwestiynau'r arolwg presennol ar ein gwefan.

Mae eich ymatebion i'r arolwg wedi'u cysylltu â data a gasglwyd gan eich darparwr AU pan oeddech yn fyfyriwr. Gweler ein Hysbysiad Casglu i Fyfyrwyr am ragor o wybodaeth am ein casgliad data AU blynyddol, gan gynnwys sut i adnabod yr eitemau data sydd wedi'u cynnwys yn y casgliadau sy'n berthnasol i chi. Rydym yn cyfeirio at yr ymatebion i Hynt Graddedigion a chasglu data blynyddol myfyrwyr AU fel "Gwybodaeth HESA".

Mae Gwybodaeth HESA yn cynnwys data personol categori arbennig, er enghraifft gwybodaeth am ethnigrwydd a statws anabledd. Mae'r math hwn o ddata mwy sensitif yn cael ei ddiogelu'n fwy gan y gyfraith, a rhaid i ni fodloni rhai amodau i'w ddefnyddio. Yng nghyd-destun arolwg Hynt Graddedigion a'r dadansoddiad data dilynol, mae'r amodau yr ydym yn dibynnu arnynt i brosesu data categori arbennig yn cynnwys y rhai sy'n ymwneud ag ymchwil a phrosesu ystadegol, cyfle cyfartal, a diogelu unigolion sy'n wynebu risg.

Sut cafodd Jisc fy manylion cyswllt?

Ac eithrio colegau AB yn Lloegr, anfonodd eich darparwr AU eich manylion cyswllt atom fel y gallwch gymryd rhan yn yr arolwg Hynt Graddedigion, fel y disgrifir yn yr Hysbysiad Casglu i Fyfyrwyr. Mae'r cyrff cyllido a rheoleiddio yn y DU yn ei gwneud yn ofynnol i ddarparwyr AU cofrestredig gyflenwi'r wybodaeth hon i ni.

Os gwnaethoch astudio mewn coleg AB yn Lloegr, cafodd eich manylion cyswllt eu darparu i ni gan yr Asiantaeth Ariannu Addysg a Sgiliau drwy'r Swyddfa i Fyfyrwyr drwy'r Cofnod Dysgwr Unigoledig.

Nid yw colegau AB yn yr Alban yn cymryd rhan yn yr arolwg Hynt Graddedigion.

Os cawsoch fenthyciad neu grant gan y Cwmni Benthyciadau Myfyrwyr, efallai eu bod nhw hefyd wedi rhoi eich manylion cyswllt i ni fel y gallwn gymharu'r rhain â'r rhai a gawsom gan eich darparwr AU, a sicrhau ein bod yn defnyddio'r wybodaeth fwyaf cywir i anfon yr arolwg Hynt Graddedigion atoch.

Sut mae Jisc yn defnyddio'ch gwybodaeth a'r seiliau cyfreithlon rydym yn dibynnu arnynt

Diben 1 – cysylltu â chi ynglŷn â'r arolwg

Rydym yn defnyddio eich enw, eich cyfeiriad e-bost a'ch rhif ffôn i gysylltu â chi ynglŷn â chwblhau'r arolwg Hynt Graddedigion.

Efallai y byddwn ni neu un o'n cyflenwyr hefyd yn defnyddio eich manylion cyswllt fel rhan o archwiliad i wirio bod yr arolwg Hynt Graddedigion wedi'i gynnal yn briodol.

Rydym yn dibynnu ar sail gyfreithiol tasg gyhoeddus at y diben hwn. Mae prosesu eich data personol yn angenrheidiol er mwyn cyflawni tasg a wneir er budd y cyhoedd neu wrth arfer awdurdod swyddogol a roddwyd i ni.

Diben 2 – cynnal yr arolwg

Rydym yn casglu'r ymatebion i'r arolwg i gyflawni ein rôl fel y corff data dynodedig ar gyfer Lloegr a'n rolau cyfatebol ar gyfer gwledydd eraill y DU. Mae ein rôl yn ei gwneud yn ofynnol i ni gasglu, cyhoeddi a lledaenu gwybodaeth am AU yn y DU. Mae'r ymatebion i'r arolwg Hynt Graddedigion yn rhan o'r wybodaeth hon.

Rydym yn crynhoi ymatebion yn setiau data mwy yr ydym yn eu dadansoddi at ddibenion ymchwil ac ystadegol. Gallwch ddarllen rhagor am hyn yn Niben 4 isod. Rydym yn dal ac yn rheoli'r data i gynnal safonau uchel parhaus o ran diogelwch, effeithlonrwydd a defnyddioldeb. Er enghraifft, rydym yn:

Sicrhau ansawdd data i wella cywirdeb
Monitro systemau a gweithdrefnau data i nodi problemau a meysydd i'w gwella
Monitro cyfraddau ymateb cyffredinol, ac fesul lefel a phwnc, i hyrwyddo perfformiad arolwg yn seiliedig ar nodweddion myfyrwyr
Monitro effeithiolrwydd ac ymgysylltiad ag e-byst arolwg Hynt Graddedigion, er enghraifft drwy ddadansoddi cyfraddau agor a rhyngweithio â chynnwys. Mae rhagor o wybodaeth am sut y gallwch optio allan o hyn ar gael yn nhroedyn pob e-bost.
Creu meysydd deilliedig i gyfoethogi defnydd a mewnwelediadau data

Rydym hefyd yn defnyddio'r data ar gyfer ymchwil a dadansoddi ynghylch defnydd yr arolwg a'i ddatblygiad yn y dyfodol, er enghraifft:

Drwy edrych ar ansawdd data a dibyniaeth y sector ar ddata cyfres amser
Drwy ystyried sut y gall roi cyd-destun i'r defnydd o wybodaeth HESA
Drwy asesu goblygiadau newidiadau mewn prosesau, systemau a meddalwedd ar allbynnau data

Rydym yn dibynnu ar sail gyfreithiol tasg gyhoeddus at y dibenion hyn. Mae prosesu eich data personol yn angenrheidiol er mwyn cyflawni tasg a wneir er budd y cyhoedd neu wrth arfer awdurdod swyddogol a roddwyd i ni.

Efallai y byddwn hefyd yn dibynnu ar sail gyfreithiol buddiannau dilys, lle mae prosesu yn angenrheidiol er mwyn cynnal safonau uchel mewn prosesau arolwg Hynt Graddedigion, effeithlonrwydd, diogelwch data a defnyddioldeb.

Diben 3 – darparu gwybodaeth i ddarparwyr AU, cyllidwyr, rheoleiddwyr ac awdurdodau cyhoeddus eraill

Rydym yn rhannu canlyniadau arolwg Hynt Graddedigion gyda'ch darparwr AU, cyllidwyr a rheoleiddwyr AU yn y DU, ac awdurdodau cyhoeddus eraill. Gwneir hyn yng nghyflawniad ein rôl fel y corff data dynodedig ar gyfer Lloegr a'n rolau cyfatebol ar gyfer gwledydd eraill y DU. Mae'r wybodaeth yn cynorthwyo'r sefydliadau hyn i gyflawni eu dyletswyddau statudol, rheoleiddiol a chyhoeddus priodol sy'n ymwneud â derbyn a defnyddio data AU. Y sefydliadau hyn yw rheolwyr data'r wybodaeth maen nhw'n ei derbyn gennym, ac mae ganddynt eu gwybodaeth preifatrwydd eu hunain sy'n esbonio eu dibenion. Weithiau mae eu dibenion yn cynnwys cysylltu data Hynt Graddedigion â gwybodaeth arall at ddibenion ymchwil.

Y cyrff cyllido a rheoleiddio AU y DU yw:

Y Swyddfa Fyfyrwyr
Medr (Comisiwn Addysg Drydyddol ac Ymchwil Cymru)
Cyngor Cyllido'r Alban
Adran yr Economi yng Ngogledd Iwerddon

Mae'r awdurdodau cyhoeddus rydyn ni'n rhannu data gyda nhw yn cynnwys:

Yr Adran Addysg
Llywodraethau Cymru a'r Alban
Yr Adran Busnes, Ynni a Strategaeth Ddiwydiannol
Ymchwil ac Arloesi yn y DU
Yr Asiantaeth Rheoleiddio Addysgu
Y Gwasanaeth Iechyd Gwladol a chyrff cysylltiedig, megis Addysg Iechyd Lloegr a'r Adran Iechyd a Gofal Cymdeithasol
Y Cyngor Meddygol Cyffredinol
Y Swyddfa Ystadegau Gwladol
Cofnodion Cenedlaethol yr Alban
Asiantaeth Ystadegau ac Ymchwil Gogledd Iwerddon
Y Swyddfa Archwilio Genedlaethol
Cwmni Benthyciadau Myfyrwyr

Yn ogystal, os byddwch yn cydsynio, byddwn yn rhannu eich manylion cyswllt gyda'n cwsmeriaid statudol – sef cyllidwyr a rheoleiddwyr AU yn y DU – at ddibenion cysylltu â chi ynglŷn â chymryd rhan mewn prosiectau ymchwil yn y dyfodol. Gallech hefyd gydsynio i'ch darparwr gysylltu â chi ynglŷn â'ch ymatebion i'r arolwg ar ôl i'r arolwg gau. Fel arall, ni fydd y sefydliadau hyn yn cysylltu â chi mewn perthynas â'ch cyfranogiad yn yr arolwg.

Rydym yn dibynnu ar sail gyfreithiol tasg gyhoeddus ar gyfer darparu gwybodaeth i ddarparwyr AU, cyllidwyr, rheoleiddwyr ac awdurdodau cyhoeddus eraill. Mae prosesu eich data personol yn angenrheidiol er mwyn cyflawni tasg a wneir er budd y cyhoedd neu wrth arfer awdurdod swyddogol a roddwyd i ni.

Rydym yn dibynnu ar gydsyniad i rannu eich manylion cyswllt gyda'n cwsmeriaid statudol yn benodol at ddibenion cysylltu â chi ynghylch prosiectau ymchwil yn y dyfodol.

Diben 4 – ein gweithgareddau ystadegol ac ymchwil

Rydym yn defnyddio data ymatebion yr arolwg at ddibenion ystadegol ac ymchwil, gan gynnwys cyhoeddi Ystadegau Gwladol.

Er enghraifft, rydym yn:

Cynnal ymchwil i ddeall deilliannau ar ôl addysg uwch.
Cynhyrchu a chyhoeddi data achrededig y Swyddfa Rheoleiddio Ystadegau
Cynhyrchu dyfyniadau ac adroddiadau data pwrpasol
Creu a gweithredu cynhyrchion ac offer delweddu a dadansoddi data, megis Heidi Plus ac Interactive Insights, a chynhyrchion a gwasanaethau eraill er budd y cyhoedd ac er budd y sector addysg ac ymchwil.
Cyhoeddi gwybodaeth er defnydd a budd i'r sector addysg ac ymchwil, ac o ddiddordeb i'r cyhoedd yn ehangach
Monitro cyfle cyfartal drwy ddadansoddi demograffeg a nodweddion graddedigion

Wrth gynhyrchu deunydd ystadegol i'w gyhoeddi, rydym yn defnyddio methodoleg talgrynnu safonol HESA. Mae'r rheolaeth ddatgelu hon yn sicrhau nad oes unrhyw ddata personol wedi'i gynnwys ac na ellir adnabod unrhyw unigolion yn y deunyddiau cyhoeddedig.

Rydym yn dibynnu ar sail gyfreithiol tasg gyhoeddus at y dibenion uchod. Mae prosesu eich data personol yn angenrheidiol er mwyn cyflawni tasg a wneir er budd y cyhoedd neu wrth arfer awdurdod swyddogol a roddwyd i ni.

Efallai y byddwn hefyd yn dibynnu ar sail gyfreithiol buddiannau dilys, lle mae prosesu yn angenrheidiol ar gyfer ymchwilio, dadansoddi a lledaenu gwybodaeth addysg uwch.

Diben 5 – darparu gwybodaeth i drydydd partïon ar gyfer prosesu ymchwil, ystadegol a newyddiadurol

Cyflenwir gwybodaeth i drydydd partïon o dan gytundebau rhannu data sy'n atal derbynwyr rhag defnyddio'r data i adnabod unigolion neu i wneud penderfyniadau amdanynt. Mae pob cytundeb yn nodi'r cyfnod y caniateir prosesu data. Fel arfer, blwyddyn yw hyn, ond gall fod yn hirach, os oes angen, at y diben ymchwil penodol.

Caiff pob cais am ddata ei asesu i weld a yw'n cydymffurfio â deddfwriaeth diogelu data a'i gydnawsedd â Hysbysiad Casglu i Fyfyrwyr HESA. Mae Jisc yn sicrhau mai dim ond y swm lleiaf o ddata sy'n angenrheidiol at y diben ymchwil penodedig sy'n cael ei gyflenwi i ddefnyddwyr. Os yw'r wybodaeth a gyflenwyd i'w chyhoeddi, rhaid cymhwyso Dull Talgrynnu HESA neu reolaeth datgelu gyfatebol.

Mae enghreifftiau o dderbynwyr data yn cynnwys:

Cyrff sector addysg uwch
Darparwyr addysg uwch
Ysgolion a darparwyr addysg bellach
Ymchwilwyr academaidd a myfyrwyr
Sefydliadau masnachol (e.e. cwmnïau recriwtio, darparwyr tai, cyflogwyr graddedigion)
Undebau
Sefydliadau anllywodraethol ac elusennau
Cyrff llywodraethau lleol, rhanbarthol, cenedlaethol a rhyngwladol
Newyddiadurwyr, y cyfryngau a sefydliadau cysylltiadau cyhoeddus

Mae Jisc yn cyhoeddi cofrestr sy'n cynnwys gwybodaeth yn ymwneud â'r derbynwyr yr ydym yn datgelu data iddynt at ddibenion ystadegol.

Efallai y byddwn hefyd yn dibynnu ar sail gyfreithiol buddiannau dilys, lle mae prosesu yn angenrheidiol ar gyfer ymchwilio, dadansoddi a lledaenu gwybodaeth am AU. Gall prosesu hefyd fod yn angenrheidiol er buddiannau dilys trydydd partïon sy'n derbyn y data, wrth ymgymryd â gweithgareddau ymchwil, ystadegol a newyddiadurol sy'n ymwneud ag AU.

Diben 6 – cymorth i unigolion mewn argyfwng

Mewn amgylchiadau eithriadol, lle mae Jisc yn dod yn ymwybodol bod eich ymatebion arolwg yn dangos bod risg sylweddol i chi neu eraill, efallai y byddwn yn cysylltu â'ch darparwr neu'n gofyn i sefydliad cymorth gysylltu â chi.

Dim ond yn yr amgylchiadau canlynol y byddwn yn rhannu'r hyn a ddywedwch wrthym ac yn cymryd y camau uchod:

Os ydych chi'n nodi eich bod wedi cymryd camau i ddod â'ch bywyd i ben neu os ydych chi'n ymddangos mewn perygl o beidio â gallu cadw'ch hun yn ddiogel rhag hunanladdiad
Rydym yn credu eich bod chi neu rywun arall wedi bod, neu'n wynebu risg o niwed difrifol

Rydym yn cymryd eich cyfrinachedd o ddifrif, a dim ond yn yr amgylchiadau a nodir uchod y byddwn yn ystyried siarad â rhywun arall neu drefnu i ni gysylltu â chi. Lle mae'r amgylchiadau hynny'n berthnasol, hyd yn oed os nad ydych wedi rhoi cydsyniad penodol i'ch darparwr gysylltu â chi, efallai y byddwn yn dal i ofyn iddynt drefnu cysylltu.

Efallai y byddwn yn dibynnu ar sail gyfreithiol buddiannau hanfodol i amddiffyn eich bywyd. Efallai y byddwn hefyd yn dibynnu ar sail gyfreithiol buddiannau dilys lle mae prosesu yn angenrheidiol i Jisc amddiffyn eich diogelwch a'ch lles.

Diben 7 – defnyddio ymatebion cyfryngau cymdeithasol graddedigion

Os byddwch yn postio'n gyhoeddus ar gyfryngau cymdeithasol (X, Facebook, LinkedIn, Instagram) eich bod wedi cwblhau'r arolwg Hynt Graddedigion, efallai y byddwn yn ymateb i'ch post, ac efallai y byddwn yn anfon neges uniongyrchol atoch mewn perthynas â hyrwyddo'r arolwg.

Weithiau byddwn yn gofyn i raddedigion sydd wedi postio'n gyhoeddus a hoffent gymryd rhan mewn gweithgareddau hyrwyddo a gynlluniwyd i annog cyd-raddedigion i gwblhau'r arolwg Hynt Graddedigion. Er enghraifft, efallai y byddwn yn gofyn a allwn ddefnyddio sgrinlun o'ch post cyfryngau cymdeithasol; dyfyniad o'ch post cyfryngau cymdeithasol; neu ddyfyniad, llun neu fideo byr a ddarparwch i ni. Gellir defnyddio'r deunyddiau hyn mewn e-byst gwahoddiad arolygon, cylchlythyrau, ar wefan Hynt Graddedigion, neu ar sianeli cyfryngau cymdeithasol Hynt Graddedigion.

Mae prosesu eich data personol er mwyn cyfathrebu â chi yn angenrheidiol at ddibenion buddiant dilys Jisc i hyrwyddo ymgysylltiad ag arolwg Hynt Graddedigion a chynyddu'r ymatebion iddo.

Rydym yn dibynnu ar eich cydsyniad i brosesu eich data personol ar ffurf deunydd hyrwyddo a gyhoeddir yn gyhoeddus.

Am ba hyd ydyn ni'n cadw eich data?

Rydym yn cadw eich manylion cyswllt am oddeutu 12 mis ar ôl i'r garfan olaf o raddedigion pob blwyddyn gael eu holi. Mae hyn er mwyn caniatáu unrhyw archwiliad neu ail-arolygu a allai fod yn ofynnol gan y cyrff ariannu a rheoleiddio, neu unrhyw ddadansoddiad ychwanegol sy'n gysylltiedig ag ansawdd y manylion cyswllt. Er enghraifft, i'r rhai sy'n graddio yn 2023/24, mae'n debygol y bydd manylion cyswllt yn cael eu dileu ym mis Rhagfyr 2026.

Rydym yn cadw ymatebion eich arolwg am 7 mlynedd ar ôl dyddiad cau casglu'r arolwg. Mae hyn er mwyn caniatáu ar gyfer unrhyw ofynion ailgyflenwi a allai fod yn ofynnol yn ystod y cyfnod hwn.

Bydd data arall, er enghraifft cyfraniadau at flogiau ac astudiaethau achos, yn cael eu cadw cyhyd ag y bo angen i gyflawni ein dibenion, yn amodol ar unrhyw hawl dileu sy'n drech.

Cedwir canlyniadau cyfanredol a dienw am gyfnod amhenodol at ddibenion ymchwil a phrosesu ystadegol.

Rhagor o wybodaeth am rannu data a defnyddio darparwyr gwasanaethau trydydd parti

Rydym yn disgrifio uchod sut rydym yn rhannu data gyda darparwyr AU, cyrff ariannu a rheoleiddio, awdurdodau cyhoeddus eraill, a thrydydd partïon ar gyfer amrywiol fuddiannau cyhoeddus a dilys.

Rydym hefyd yn defnyddio nifer o gyflenwyr trydydd parti i'n helpu i gyflawni'r arolwg. Mae'r rhain yn cynnwys ein darparwr canolfan alwadau, IFF Research, a'n cyflenwr datrysiadau rheoli adborth, Forsta. Darllenwch ragor am ein cyflenwyr.

Efallai y byddwn hefyd yn rhannu eich data gydag amrywiaeth o sefydliadau allanol lle bo'n angenrheidiol at ein dibenion, fel y caniateir neu sy'n ofynnol gan y gyfraith, gan gynnwys y canlynol:

Cwmnïau o fewn ein grŵp
Ein cyflenwyr trydydd parti, partneriaid busnes ac isgontractwyr at ddibenion gweinyddu busnes, cymorth, prosesu, yswiriant, bancio neu TG. Er enghraifft, drwy ddefnyddio systemau rheoli perthnasoedd cwsmeriaid
Ein cynghorwyr proffesiynol, gan gynnwys archwilwyr allanol sy'n darparu gwasanaethau proffesiynol i ni ac sydd wedi'u rhwymo gan rwymedigaethau cyfrinachedd
Dadansoddeg neu beiriannau chwilio sy'n ein galluogi i optimeiddio a gwella eich profiad ar y wefan
Trydydd partïon, er enghraifft safleoedd cyfryngau cymdeithasol, yr ydych yn cydsynio i ni rannu eich data â nhw
Ein rheoleiddwyr, asiantaethau gorfodi'r gyfraith neu atal twyll, yn ogystal â'n cynghorwyr cyfreithiol, llysoedd, tribiwnlysoedd, yr heddlu ac unrhyw gyrff awdurdodedig eraill, at ddibenion ymchwilio i unrhyw weithgarwch troseddol gwirioneddol neu a amheuir neu faterion rheoleiddiol neu gyfreithiol eraill
Trydydd parti sydd wedi prynu neu uno â'n sefydliad, ac yn yr achos hwnnw bydd data personol a gedwir gennym amdanoch chi yn cael ei drosglwyddo i'r trydydd parti hwnnw (a'i gynghorwyr proffesiynol) i gynnal ein busnes

Rydym yn sicrhau bod cytundebau rhannu data ar waith cyn rhannu eich data ag unrhyw reolwyr data eraill. Bydd gan reolwyr data annibynnol eu gwybodaeth preifatrwydd eu hunain, ac maent yn gyfrifol am drin eich data yn unol â chyfraith diogelu data.

Pan fyddwn yn penodi proseswyr data i'n cynorthwyo gydag unrhyw weithgarwch prosesu data, maent wedi'u rhwymo'n gontractol i weithredu ar ein rhan ac yn unol â'n cyfarwyddiadau. Mae ein contractau yn eu hatal rhag defnyddio eich data at unrhyw ddiben y tu allan i'r hyn rydym wedi gofyn iddynt ei wneud fel ein prosesydd data.

Trosglwyddiadau data rhyngwladol

Rydym yn cadw ein data yn y DU ac Iwerddon.

Fodd bynnag, mae'n bosib bod rhai o'n cyflenwyr wedi'u lleoli y tu allan i'r DU. Os byddwn yn trosglwyddo eich data y tu allan i'r DU, rydym yn sicrhau bod un o'r mesurau diogelwch priodol canlynol ar waith, yn unol â chyfraith diogelu data:

Penderfyniad digonolrwydd gan yr Ysgrifennydd Gwladol, sy'n dweud bod y wlad sy'n derbyn y data yn darparu lefel ddigonol o ddiogelwch i ddata personol
Ffurf gymeradwy o gontract i ddiogelu'r data personol, sef naill ai Atodiad y DU i gymalau cytundebol safonol yr UE, neu gytundeb trosglwyddo data rhyngwladol y DU
Eithriad cyfreithlon i'r rheolau sy'n ymwneud â throsglwyddiadau data tramor

Diogelwch

Mae Jisc yn cymryd diogelwch gwybodaeth o ddifrif, ac mae wedi ymrwymo i gadw eich data yn ddiogel. Mae Jisc wedi'i ardystio i safonau diogelwch gwybodaeth, ac mae'n ymgymryd â monitro manwl o'i systemau. Mae hyn yn cynnwys cofnodi cyfeiriadau IP defnyddwyr system yr arolwg.

Mae Jisc wedi'i ardystio i safon ryngwladol ISO27001 ar gyfer rheoli diogelwch gwybodaeth, a safon Hanfodion Seiber y DU ar gyfer seiberddiogelwch. Mae'r systemau a ddefnyddir i gynnal yr arolwg Hynt Graddedigion yn destun profion treiddiad i adnabod a lleihau gwendidau.

Mae'r system arolwg ar-lein yn cofnodi cyfeiriad IP, system weithredu a phorwr pob defnyddiwr at ddibenion diogelwch ac archwilio, ac i wella ansawdd system yr arolwg.

Eich hawliau preifatrwydd

Mae eich hawliau data personol yn caniatáu ichi wybod am eich data personol a chymryd camau gweithredu mewn perthynas ag ef pan fydd yn cael ei gadw gan sefydliadau, megis Jisc. Nid yw pob hawl ar gael ym mhob achos, ac mae rhai eithriadau sy'n trechu eich hawliau mewn rhai amgylchiadau. Fodd bynnag, rydym bob amser yn ceisio cyflawni unrhyw gais am hawliau data personol lle bo modd.

Yr hawl i gael gwybod

Mae gennych hawl i wybod pa ddata personol sydd gennym amdanoch chi, a pham a sut rydym yn ei brosesu. Mae'r gyfraith yn ein rhwymo i roi gwybodaeth preifatrwydd i chi, ac rydym yn gwneud hyn drwy ein hysbysiadau preifatrwydd.

Yr hawl mynediad

Mae gennych hawl i ofyn i ni am gopi o'r data personol sydd gennym amdanoch chi. Gelwir hyn yn 'cais am fynediad at ddata gan y testun', neu SAR.

Gallwch ofyn i ni am gopi o unrhyw wybodaeth sydd gennym amdanoch chi, ond mae adegau pan fydd y gyfraith yn dweud nad oes angen i ni ei darparu. Byddwn yn gwneud chwiliad rhesymol a chymesur am eich data, ac efallai y byddwn yn atal gwybodaeth sy'n datgelu data personol rhywun arall.

Yr hawl i gywiro

Mae gennych hawl i ofyn i ni gywiro neu ddileu data personol anghywir. Os ydych chi'n credu ein bod ni'n dal data anghyflawn amdanoch chi, gallwch hefyd ofyn i ni ei gwblhau drwy ychwanegu rhagor o fanylion.

Yr hawl i ddileu

Mae gennych yr hawl i ofyn i ni ddileu data personol sydd gennym amdanoch chi. Weithiau gelwir hyn yn 'hawl i anghofio', a dim ond mewn amgylchiadau cyfyngedig y mae'n berthnasol.

Nid yw'r hawl i ddileu yn berthnasol i weithgareddau sy'n dod o dan sail gyfreithiol tasg gyhoeddus. Fodd bynnag, ein polisi yw derbyn ceisiadau dileu a wneir cyn hanner nos ar 31 Rhagfyr mewn blwyddyn gasglu benodol. Bydd ceisiadau dileu a wneir yn hwyrach na'r dyddiad hwn yn cael eu gwrthod.

Yr hawl i gyfyngu ar brosesu

Mewn rhai amgylchiadau, mae gennych hawl i ofyn i ni gyfyngu, neu gyfyngu dros dro, ar y ffordd rydym yn prosesu eich data. Er enghraifft, pan fyddwch wedi herio cywirdeb eich data neu wedi gwrthwynebu i ni ei ddefnyddio, efallai y byddwch yn gofyn i ni roi'r gorau i wneud rhywbeth gyda'ch data nes bod y problemau hyn wedi'u datrys.

Yr hawl i wrthwynebu

Mae gennych hawl i wrthwynebu'r ffordd rydym yn defnyddio eich data personol ar unrhyw adeg. Fodd bynnag, nid yw hyn yn golygu y byddwn bob amser yn rhoi'r gorau i ddefnyddio eich data at y dibenion rydych chi wedi gwrthwynebu iddynt. Byddwn yn ystyried eich buddiannau a'ch hawliau ac yn penderfynu a yw'r rhain yn drech na'n rhesymau dilys dros barhau.

Yr hawl i dynnu cydsyniad yn ôl

Ar unrhyw adeg ar ôl cydsynio i ni ddefnyddio eich data, gallwch dynnu eich cydsyniad yn ôl.

Rhagor o wybodaeth am Jisc a sut i gysylltu â ni

Mae Jisc yn gwmni nid-er-elw cyfyngedig drwy warant, wedi'i gofrestru yn Lloegr.

Rhif cwmni: 05747339

Rhif elusen yng Nghymru a Lloegr: 1149740; rhif elusen yn yr Alban: SC053607

Rhif cofrestru ICO: Z9546606

Swyddfa gofrestredig: 4 Portwall Lane, Bryste, BS1 6NB.

O dan Ddeddf Addysg Uwch ac Ymchwil 2017, Jisc yw'r corff data dynodedig ar gyfer addysg uwch yn Lloegr.

Mae is-gwmni sy'n eiddo llwyr i Jisc, sef Jisc Services Limited, wedi'i gofrestru yn Lloegr - rhif cwmni: 02881024. Mae gan Jisc Services Limited yr un manylion cyswllt a staff â Jisc, ac mae wedi'i gofrestru gyda'r ICO: ZB729749.

Mae'r ddau gwmni wedi penodi swyddog diogelu data (DPO). I gysylltu â'r DPO a thîm preifatrwydd Jisc, gallwch e-bostio data.protection@hesa.ac.uk.

Cwynion

Os ydych chi'n anfodlon â'r ffordd rydym wedi trin eich data personol neu wedi delio â chais am hawliau gwybodaeth, cysylltwch â'n tîm preifatrwydd gan ddefnyddio'r e-bost a nodir uchod. Hoffem gael y cyfle i ymateb a gobeithio datrys y broblem. Os byddwch yn anfodlon o hyd, mae gennych hawl i gwyno i'r ICO.

Mae'r ICO yn cyhoeddi gwybodaeth, cymorth ac arweiniad am eich hawliau a sut i'w harfer, y gallwch eu darllen ar wefan yr ICO.

Dyddiad cyhoeddi: 1 Rhagfyr 2025